రవితేజ, కొత్త దర్శకుడితో సినిమా మొదలు
Admin 2021-07-01 17:41:12 entertainmen
రవితేజ తన సినిమాల విషయంలో పెద్దగా గ్యాప్ ఇవ్వడు. ఒక సినిమా పూర్తవుతుండగానే, తదుపరి సినిమా సెట్స్ పైకి వెళ్లేలా ఆయన ప్లాన్ చేసుకుంటాడు. అందువలన ఏడాదికి మూడు సినిమాలు ఆయన నుంచి వస్తుంటాయి. ఈ ఏడాది ఆరంభంలోనే 'క్రాక్' సినిమాతో తిరుగులేని హిట్ అందుకున్న రవితేజ, ఆ తరువాత సినిమా అయిన 'ఖిలాడి'ని కూడా పూర్తిచేశాడు. ఈ రోజున మరో ప్రాజెక్టును పట్టాలెక్కించాడు. కెరియర్ పరంగా ఇది రవితేజకు 68వ సినిమా. శరత్ మండవ అనే కొత్త దర్శకుడికి రవితేజ గ్రీన్ సిగ్నల్ ఇచ్చాడు. ఆ వెంటనే పూజా కార్యక్రమాలను కూడా పూర్తి చేశారు. ఆ సినిమా రెగ్యులర్ షూటింగును ఈ రోజున మొదలుపెట్టారు. రవితేజ ఈ సినిమాను కూడా చాలా వేగంగా పూర్తిచేయనున్నట్టు చెబుతున్నారు. ఈ సినిమాలో ఆయన సరసన నాయికగా దివ్యాన్ష కౌశిక్ సందడి చేయనుంది.